<\/p>\n
Hurmatli uchrashuv ishtirokchilari!<\/strong><\/p>\n Hurmatli Odil Reno-Basso xonim!<\/strong><\/p>\n Qadrli do\u2018stlar!<\/strong><\/p>\n Sizlarni Xorijiy investorlar kengashining navbatdagi yalpi majlisida ko\u2018rib turganimdan xursandman.<\/p>\n Avvalo, hurmatli Reno-Basso xonim, islohotlarimizni doimiy qo\u2018llab-quvvatlab kelayotganingiz va Kengash faoliyatidagi samarali raisligingiz uchun sizga chin qalbimdan minnatdorlik bildiraman. Shu bilan birga, bugungi anjumanda qatnashayotgan barcha xalqaro tashkilotlar va xorijiy kompaniyalar rahbarlariga samimiy ehtiromimni izhor etaman.<\/p>\n Hurmatli xonimlar va janoblar!<\/strong><\/p>\n So\u2018nggi yillarda Kengash oddiy maslahat mexanizmidan amaliy islohotlar maydoniga, Yangi O\u2018zbekiston bilan jahon investitsiya hamjamiyati o\u2018rtasidagi ishonchli ko\u2018prikka aylandi. Bugun Kengash mustaqil Assotsiatsiya maqomiga ega bo\u2018lib, tom ma\u2019noda kuchli institut darajasiga ko\u2018tarildi. O\u2018tgan bir yil davomida Kengashda ishtirok etayotgan kompaniyalar soni 54 tadan 85 taga yetdi. Ular iqtisodiyotimizning 23\u00a0ta tarmog\u2018ini qamrab olib, ishchi guruhlar faoliyatida bevosita ishtirok etmoqda. Bundan tashqari, Yevropa tiklanish va taraqqiyot banki, Osiyo taraqqiyot banki va Xalqaro moliya korporatsiyasi Kengashning Ijroiya qo\u2018mitasi tarkibida faoliyat yuritmoqda.<\/p>\n E\u2019tiborli tomoni, barcha a\u2019zolarimizning Kengashdagi faolligi tobora oshmoqda. Bu \u2013 mazkur investitsiya platformasiga bo\u2018lgan yuksak ishonchning yaqqol dalilidir.<\/p>\n Hurmatli kengash ishtirokchilari!<\/strong><\/p>\n Sizlar bilan o\u2018tgan yili ham uchrashib, ko\u2018p masalalarni gaplashib olgan edik. Avvalgi majlisda ilgari surilgan 21\u00a0ta tashabbusga aniq yechimlar berildi.<\/p>\n Shuni alohida ta\u2019kidlamoqchiman, investorlarning tashabbuslari davlat siyosatida o\u2018zining amaliy ifodasini topmoqda. Takliflarning salmoqli qismi asosida normativ-huquqiy hujjatlarni takomillashtirdik. Jumladan: Soliq kodeksiga investorlar uchun qulay bo\u2018lgan o\u2018zgartirishlar kiritildi; kompaniyalar o\u2018rtasidagi ichki qarz bitimlari moliya nazoratidan chiqarildi; asosiy vositalarni tezlashtirilgan tartibda amortizatsiya qilish huquqi berildi; xalqaro standartlar asosida hisobot yurituvchi xorijiy shirkatlar uchun ko\u2018plab majburiy talablar bekor qilindi.<\/p>\n Bundan tashqari, \u201cMuqobil investitsiya jamg\u2018armalari to\u2018g\u2018risida\u201dgi qonun loyihasi ishlab chiqildi. Mas\u2019uliyatli biznes yuritish standartlarini joriy etish hamda 16 ta texnik reglamentni xalqaro me\u2019yorlarga muvofiqlashtirish dasturi tayyorlandi.<\/p>\n Shu bilan birga, xorijiy investorlarga teng va adolatli sharoit yaratish bo\u2018yicha xalqaro majburiyatlarni o\u2018z zimmamizga olishda yangi qadamlar tashladik. Yaqinda Iqtisodiy hamkorlik va taraqqiyot tashkilotining Xalqaro investitsiyalar va ko\u2018p millatli korxonalar to\u2018g\u2018risidagi deklaratsiyasiga qo\u2018shilishimizni e\u2019lon qildik. Ushbu yo\u2018nalishdagi ishlarning mantiqiy davomi sifatida Toshkent xalqaro moliya markazi to\u2018g\u2018risidagi Konstitutsiyaviy qonun qabul qilinishi kutilmoqda.<\/p>\n Bularning barchasi \u2013 g\u2018oyalaringiz amaliyotda tatbiq etilayotganiga yorqin dalildir.<\/p>\n Hurmatli Kengash ishtirokchilari!<\/strong><\/p>\n O\u2018tgan davrda Kengash huzuridagi ishchi guruhlar tomonidan investorlar uchun 50 dan ortiq foydali yig\u2018ilishlar o\u2018tkazildi. Natijada muqobil investitsiya jamg\u2018armalari, garov qonunchiligi, mas\u2019uliyatli biznes yuritish, professional kadrlar tayyorlash, soliq ma\u2019murchiligi, yer ajratish va energetika kabi ustuvor yo\u2018nalishlar bo\u2018yicha muammolar xorijiy investorlar hamraisligida atroflicha muhokama qilindi.<\/p>\n Bugungi majlisga tayyorgarlik jarayonida sizlardan 120\u00a0ta yangi taklif va tashabbus kelib tushdi. Ularning barchasini batafsil tahlil qilib, yettita ustuvor yo\u2018nalishga birlashtirdik. Bular: investitsiya muhitini yaxshilash, soliq tizimi, kadastr, energetika, moliya va bank tizimi, korporativ boshqaruv, sun\u2019iy intellekt va raqamli iqtisodiyot masalalaridir.<\/p>\n Ayniqsa, valyuta aylanmasidagi monitoring jarayonlarini yengillashtirish; islomiy sug\u2018urta, \u201cyashil\u201d kredit, banklarning muammoli aktivlari savdosini yo\u2018lga qo\u2018yish kabi yangi moliyaviy mexanizmlarni joriy qilish; korxonalarda atrof-muhit, ijtimoiy mas\u2019uliyat va samarali boshqaruvni o\u2018z ichiga olgan ESG tamoyillari qo\u2018llanishini rag\u2018batlantirish kabi takliflar hozir har qachongidan ham dolzarbdir.<\/p>\n Shu bois, har bir yo\u2018nalish bo\u2018yicha mas\u2019ullar belgilanib, aniq yechimlar ishlab chiqildi.<\/p>\n Fursatdan foydalanib, mana shu dolzarb vazifani o\u2018z zimmasiga olgan ishchi guruhlar hamraislari: \u201cVision Invest\u201d, \u201cBDO\u201d, \u201cCrowe\u201d, \u201cOTP Group\u201d, \u201cFranklin Templeton\u201d, \u201cErnst & Young\u201d, \u201cKosta Legal\u201d va \u201cACWA Power\u201d kompaniyalari rahbarlariga minnatdorlik bildiraman.<\/p>\n Shuningdek, yil davomida samarali faollik ko\u2018rsatib, muhim hujjatlar va puxta tashabbuslar tayyorlagani uchun Kengashning barcha a\u2019zolariga alohida tashakkur aytaman.<\/p>\n Hurmatli xonimlar va janoblar!<\/strong><\/p>\n Endi bevosita muloqotga o\u2018tsak.<\/p>\n Yil davomidagi tahlillaringiz asosida qanday muammolarni aniqladingiz? Investitsiya muhitini yanada yaxshilash uchun Hukumat nima ishlar qilishi kerak?<\/p>\n Bugun ushbu zalda Hukumat a\u2019zolari \u2013 Bosh vazir o\u2018rinbosarlari va vazirlar ishtirok etmoqda. Sizlarni diqqat bilan tinglashga, har bir muammo va tavsiyani batafsil muhokama qilishga tayyormiz. Ishimizni yanada samarali tashkil etish bo\u2018yicha takliflaringiz bo\u2018lsa, ularni ochiq muloqot ruhida ko\u2018rib chiqamiz.<\/p>\n Albatta, bugun ko\u2018tariladigan barcha masalalar umumlashtirilib, majlisimiz yakunlari bo\u2018yicha yagona \u201cyo\u2018l xaritasi\u201d ishlab chiqiladi. Bosh vazir o\u2018rinbosari J.Xo\u2018jayev va Investitsiyalar, sanoat va savdo vaziri L.Qudratov har chorakda ularning ijrosi bo\u2018yicha menga shaxsan hisobot berib boradi.<\/p>\n Endi fikr va mulohazalaringizni eshitamiz.<\/p>\n ***<\/p>\n Hurmatli do\u2018stlar!<\/strong><\/p>\n Bugungi muloqotimiz g\u2018oyat mazmunli va foydali bo\u2018ldi. Ayniqsa, amaliy natijaga yo\u2018naltirilgan takliflaringizdan juda xursand bo\u2018ldim.<\/p>\n Chin hamkorlarimizning barcha tashabbuslari xalqimiz farovonligi va investitsiya muhitini yaxshilashga xizmat qiladi. Yangi O\u2018zbekistonda ochiq, barqaror va raqobatbardosh iqtisodiyotni barpo etishga qo\u2018shayotgan hissangiz biz uchun doim qadrli.<\/p>\n Bu kabi muloqotlarimiz qancha ko\u2018p bo\u2018lsa, ishimiz shuncha oldinga ketadi. Barchangizga Kengashimizda ishtirok etganingiz uchun samimiy rahmat aytmoqchiman.<\/p>\n Fursatdan foydalanib, sizlarga mustahkam sog\u2018liq, professional faoliyatingiz va shaxsiy hayotingizda ulkan muvaffaqiyatlar tilayman.<\/p>\n
\n