Samarqandda boʻlib oʻtgan II Oʻzbekiston iqtisodiy forumi doirasida Oʻzbekiston hukumati xalqaro moliya tashkilotlaridan 923,3 million dollar mablagʻ jalb qildi.
Pul Osiyo taraqqiyot banki (OTB), Jahon banki va boshqa moliya institutlari bilan tuzilgan shartnomalar asosida beriladi. Mablag’larning asosiy qismi byudjet ehtiyojlari va infratuzilmasiga yo’naltiriladi.
Eng katta qiymatga shartnoma OTB bilan tuzilgan. Uning doirasida O‘zbekiston oziq-ovqat xavfsizligi va ijtimoiy himoyani ta’minlash uchun kontratsiklik byudjet xarajatlarini (BRACE) qo‘llab-quvvatlash uchun 500 million dollar oladi.
Moliya vazirligi Xalqaro Islom savdo va moliya korporatsiyasi (ITFC) bilan byudjet xarajatlarini qo‘llab-quvvatlash uchun yana 100 million dollar ajratish bo‘yicha kelishib oldi. Bundan tashqari, Yevropa tiklanish va raraqqiyot banki (YeTTB) mamlakatda Davlat-xususiy sherikchilik (DXSh)ni rivojlantirish loyihalarini moliyalashtirish uchun 20 million dollar ajratadi.
OTB O‘zbekiston bilan yana bir shartnoma – DXSh asosida Buxoroda issiqlik tarmoqlarini modernizatsiya qilish bo‘yicha shartnoma tuzdi. Buning uchun birinchi bosqichda 100 million dollar kredit ajratadi.
Shuningdek, OTB Orol dengizi havzasidagi suv resurslarini boshqarishni iqlim o‘zgarishiga moslashtirish uchun 3,3 million dollar miqdorida grant ajratadi. Avvalroq bank O‘zbekistonga 150 million dollar kredit ajratilishini ma’lum qilgandi va bu kredit xududda sug‘orish tizimini yaxshilashga yo‘naltiriladi.
Moliya vazirligi oʻrta shaharlarni rivojlantirish, ularning infratuzilmasi va shahar xizmatlarini modernizatsiya qilish loyihasini moliyalashtirish uchun Jahon bankidan 100 million dollar olishga kelishib oldi. AIIB bu maqsadlar uchun bir xil miqdorda ajratadi.
Bundan tashqari, xorijiy tashkilotlar DXSh loyihalari bo‘yicha maslahatchi vazifasini bajaradi. OTB Andijon va Buxoroda bolalar bog‘chalari (75 million dollar) va tibbiyot markazlari (240 million dollar) qurilishida, YeTTB yotoqxonalar qurilishida (115 million dollar) ishtirok etadi.
Tijorat banklari tomonidan 201 million dollarlik yana 12 ta shartnoma imzolandi. Bu mablag‘ning yarmidan ko‘pi (115 million dollar) xususiy sektorni rivojlantirish bo‘yicha Islom korporatsiyasi tomonidan ajratilgan bo‘lib, beshta moliya instituti bilan kelishilgan.