O‘zbekiston Respublikasining xalqaro zaxiralari 2022-yil dekabr oyida 6,9 foizga oshib, 2023-yil 1-yanvar holatiga 35.767,5 million AQSh dollariga yetdi. Oltin zahirasi qimmatbaho metalning jismoniy hajmining pasayishiga qaramay, statistikani yuritish bo’yicha rekordni yangiladi.

O‘zbekistonning rasmiy zaxira aktivlari 2023-yil 1-yanvar holatiga ko‘ra, o‘tgan oyda 2,33 milliard dollarga (+6,9 foiz) o‘sib, 35,77 milliard dollarni tashkil etdi, deb xabar beradi O‘zbekiston Respublikasi Markaziy banki. Zaxiralar 2022-yil aprelidan beri eng yuqori darajaga yetdi.

O‘sish, asosan, valyuta zaxiralarining 1,71 milliard dollarga ko‘payib, 11,64 milliard dollarga yetgani hisobiga sodir bo‘ldi.

Oltinning jismoniy hajmi 0,1 million troy untsiyaga (3,1 tonna) pasayib, 12,7 million troya untsiyasini (taxminan 360 tonna) tashkil etdi. Shu bilan birga, oltin zaxiralari qiymati 600,8 million dollarga oshib, 23,06 milliard dollarga yetdi, bu statistik ma’lumotlar e’lon qilinganidan beri (2013 yildan boshlab) mutlaq rekorddir.

Dollarning jahon valyutalariga nisbatan qadrsizlanishi fonida jahon birjalarida oltin kotirovkalari o’sishda davom etmoqda. Xususan, yil boshida ushbu qimmatbaho metalning fyucherslari o‘tgan yilning iyun oyidan beri birinchi marta untsiya uchun 1850 dollardan oshdi, garchi dekabr oyi boshida ular 1776 dollarni tashkil etgan edi.

Oltin narxining oshishi munosabati bilan O‘zbekiston dekabr oyida so‘nggi 7 oy ichida birinchi marta ushbu qimmatbaho metal eksportini tiklab, 556,7 million dollarlik mahsulot sotdi.

Umuman olganda, yil davomida mamlakatimiz oltin-valyuta zaxiralari 628,3 million dollarga – 35,14 milliard dollardan 35,77 milliard dollarga oshgan.

Mavjud zaxiralar 2022-yilning yanvar-noyabr oylari uchun mamlakat importidan sezilarli darajada oshib, 27,6 milliard dollarni tashkil etdi. Rivojlanayotgan mamlakatlar uchun xalqaro tashkilotlarning tavsiyalariga ko’ra, zaxiralar kamida uch oylik importni qoplashi kerak.